კუნთოვანი დაღლილობა
კუნთოვანი დაღლილობა შეიძლება განვითარდეს ვარჯიშის შემდეგ, თუმცა ის შესაძლოა გამოწვეული იყოს გარკვეული მედიკამენტებით ან ჯანმრთელობის მდგომარეობების შედეგად, როგორიცაა ანემია, გაუწყლოვანება, დეპრესია, C ჰეპატიტი და სხვა.
ვარჯიშის დაწყებისას ან რაიმე სამუშაოს შესრულებისას, თქვენი კუნთები ძლიერად, მდგრადად და გამძლედ გრძნობენ თავს, თუმცა დროთა განმავლობაში და გარკვეული მოძრაობების მუდმივი გამეორებისას, კუნთებმა შეიძლება სიძლიერე დაკარგონ და დაღლილობა იგრძნონ. ამას კუნთოვანი დაღლილობა ეწოდება.
კუნთოვანი დაღლილობა არის სიმპტომი, რომელიც ამცირებს კუნთების უნარს, შეასრულონ მოქმედებები სწორად, დროთა განმავლობაში. ის ხშირად ასოცირდება ენერგიის დაქვეითებასთან, განსაკუთრებით ფიზიკური დატვირთვის ან ინტენსიური ვარჯიშის შემდეგ. როდესაც დაღლილობას განიცდით, კუნთოვანი მოძრაობების ძალა იკლებს, რაც სისუსტის შეგრძნებას იწვევს.
მიუხედავად იმისა, რომ კუნთოვანი დაღლილობის ყველაზე ხშირი მიზეზი ვარჯიშია, ის შეიძლება გამოწვეული იყოს სხვა ჯანმრთელობის პრობლემებითაც.
კუნთოვანი დაღლილობის მიზეზები
ვარჯიში და სხვა ფიზიკური აქტივობა კუნთოვანი დაღლილობის ხშირი მიზეზია. თუმცა, მისი გამომწვევი სხვა მიზეზებიც არსებობს, მათ შორის:
- ადისონის დაავადება
- ასაკი
- ანემია
- შფოთვა
- ბოტულიზმი
- ცერებრალური დამბლა
- ქიმიოთერაპია
- ქრონიკული დაღლილობის სინდრომი (CFS)
- გაუწყლოვანება
- დეპრესია
- ფიბრომიალგია
- C ჰეპატიტი
- HIV
- ჰიპოთირეოზი
- გრიპი
- ფიზიკური არააქტიურობა
- რძემჟავას დაგროვება
- მედიკამენტები
- მინერალების დეფიციტი
- კუნთოვანი დისტროფია
- მიოზიტი (კუნთების ანთება)
- კუნთოვანი ტონის დაქვეითება
- ორსულობა
- ძილის ნაკლებობა
- ინსულტი
- ტუბერკულოზი
კუნთოვანი დაღლილობის სიმპტომები
კუნთოვანი დაღლილობა შეიძლება სხეულის ნებისმიერ ნაწილზე განვითარდეს. ამ მდგომარეობის საწყისი ნიშანია კუნთოვანი სისუსტე.
სხვა თანმხლები სიმპტომებია:
- კუნთების ტკივილი
- ლოკალური ტკივილი
- ქოშინი
- კუნთოვანი ტოკვა
- ცახცახი
- ხელებში სისუსტე
- კრუნჩხვები
თუ ყოველდღიური საქმიანობის შესრულებაში სირთულეებს განიცდით ან სიმპტომები მძიმდება, დაუყოვნებლივ მიმართეთ ექიმს – ეს შეიძლება უფრო სერიოზული ჯანმრთელობის პრობლემის ნიშანი იყოს.
კუნთოვანი დაღლილობის მკურნალობა
მკურნალობა დამოკიდებულია კუნთოვანი დაღლილობის გამომწვევ მიზეზსა და თანმხლებ სიმპტომებზე. თუ დაღლილობას განიცდით, განსაკუთრებით მაშინ, როდესაც ის ვარჯიშთან არ არის კავშირში, გირჩევთ, მიმართოთ ექიმს. ექიმი შეისწავლის თქვენს სამედიცინო ისტორიასა და სიმპტომებს და გამოიტანს შესაბამის დიაგნოზს.
ბევრ შემთხვევაში, კუნთოვანი დაღლილობა გაუმჯობესდება დასვენებითა და ორგანიზმის აღდგენით. საკმარისი წყლის მიღება და ჯანსაღი კვება ხელს უწყობს სწრაფ გამოჯანმრთელებას, იცავს კუნთებს დაღლილობისა და სისუსტისგან და უზრუნველყოფს ორგანიზმისთვის აუცილებელ ნივთიერებებს.
ვარჯიშის წინ და შემდეგ აუცილებლად გააკეთეთ კუნთების გაწელვა. კუნთების გახურება ამცირებს დაზიანების რისკს.
თუ კუნთოვანი დაღლილობა უფრო სერიოზულ ხასიათს მიიღებს, შესაძლოა საჭირო გახდეს მედიკამენტური მკურნალობა. ექიმმა შეიძლება დაგინიშნოთ ანთების საწინააღმდეგო ან ანტიდეპრესანტი პრეპარატები. მძიმე შემთხვევებში რეკომენდებულია ფიზიკური თერაპია, რაც ზრდის მოძრაობის შესაძლებლობას და აჩქარებს გამოჯანმრთელებას. მკურნალობის დაწყებამდე აუცილებლად გაესაუბრეთ თქვენს ექიმს.
პროგნოზი
კუნთოვანი დაღლილობა ამცირებს კუნთოვანი მოქმედებების სიძლიერეს. უმეტესად ეს სიმპტომი არ წარმოადგენს საფრთხეს, თუ ის დასვენების შემდეგ თავისით გაივლის.
მძიმე შემთხვევებში კი ის შეიძლება სერიოზული დაავადების მაჩვენებელი იყოს. კუნთოვანი დაღლილობა იწვევს ზედმეტ დატვირთვას და ზრდის ტრავმის რისკს. თავი შეიკავეთ თვითდიაგნოზისგან. თუ კუნთოვანი დაღლილობა თან სდევს სხვა უჩვეულო სიმპტომებს ან მდგომარეობა რამდენიმე დღის შემდეგაც არ უმჯობესდება, დაგეგმეთ ვიზიტი ექიმთან.
